大家都知香港騎師收入高，雷神莫雷拉獎金固然係天文數字，今季個人暫時已袋起碼1,300萬，仲未計馬主打賞及策騎費。就算榜尾嘅湯智傑，5月份冇馬跑入過前四名，但計埋本周三（27日），本月未完策騎費已有三萬蚊，所以就算成績欠佳，好多華將都希望繼續騎落去，事關單係策騎費已足夠維生。
不過另一小將呂卓賢，卻有被逼轉行危機，今季佢曾經喪放「一馬當先」被重罰，紀錄已經唔好。到咗剛戰策「馬來之珍」，末段斜跑嚴重阻到「領先直前」又衰咗，稍後要停賽六期，更被馬會狂插，話佢已經第七次不小心策騎，表現未達香港騎師應有水平，仲話下季是否發牌畀佢要諗諗喎！
嘩，講到咁大件事，相信25歲嘅賢仔都知驚喇啩！唔想轉行嘅話，唯一做法只有跑好啲馬，贏多幾場畀馬會睇。本周三佢嘅座騎中，「董事長」上仗放入第四有起色，今次只孭109磅輕飄飄，放出固然爆得；而另一座騎「好勝煌」已比贏馬時狂減27分，上場輸唔遠可見有狀態，今次爭曾勝嘅泥地一哩，賢仔醒醒定定呀！