內地創業板今年至今狂飆136%，已被稱為「神創板」，股價向上衝之際，眾多創業板股老闆紛紛乘機掟貨。其中最震撼係，龍頭股樂視網大股東賈躍亭上周末宣佈，未來半年將減持最多8%股份，目前市值約110億元（人民幣．下同），消息累樂視網股價昨日逆市跌1.9%。
樂視網係創業板中的神話股。賈躍亭為山西煤老闆出身，去年山西反貪，佢一度滯留海外避難，期間樂視網股價大跌。去年底賈躍亭終於可回國，樂視網又風生水起，今年至今股價翻4倍，而家市值達1,400億元。
樂視網公告話，賈躍亭減持套現所得，會借畀公司做營運之用，但呢招本身已表明唔睇好股價。據內地Wind資訊統計顯示，單單上個禮拜，創業板就有超過40家上市公司發佈股東減持公告，乘機散水。
黃尹華