黑雨、紅雨都無阻維達（3331）小股東走去股東會撐場兼攞大袋紙巾做紀念品！維達噚日中午喺尖沙嘴一間五星酒店舉行股東會，咁啱噚日朝早勁大雨，天文台喺10點半左右仲發出今年首個黑雨警告，維持大約一粒鐘，之後改為黃雨，但係60名維達小股東依然準時出席股東會。
咁公司待佢哋都不薄，小股東離開時，可以攞大袋紙巾紀念品，仲有西餅與餅卡，個別小股東仲可以攞走幾大袋紙巾，認真係滿載而歸。由於小股東人數太多，公司預唔夠數，現場唔夠紙巾派，搞到要後補畀番小股東㖭呀。
其中一名小股東李先生十分認同公司派紙巾做紀念品嘅做法，佢認為，唔止益小股東咁簡單，直情可以收宣傳之效。另外有小股東就認真想去聽下管理層對未來公司發展嘅睇法。查實過去兩個月，維達股價累升4成，華華都替呢班小股東高興。