民主黨主席劉慧卿主持嘅網台節目《議會內外》，噚日請咗接手民建聯主席無耐嘅李慧琼（Starry）做嘉賓。Starry一去到，凳都未坐就開口叫卿姐周日去深圳同京官會面傾政改，仲話卿姐成日質疑建制派、官員冇如實向北京反映，咁今次自己去就最好不過。
不過卿姐話，想當年返過去幾次，但1998年至今都未拎到回鄉證，佢越講越激動，話自己係中國人，冇理由俾人褫奪進出中國嘅自由，所以今次係唔會去，但民主黨會有人上去將建制「唔敢講、唔肯講、唔想講」嘅意見向中央官員反映。卿姐做主席一向有威嚴，佢噚日問Starry做咗主席「鎮唔鎮得住」，Starry笑言唔使「鎮」，佢靠同黨友「傾」喎。