何倍倩（Anina）做護膚品生意，自己當然要keep住靚做生招牌，佢對3位年幼子女一樣有護膚心得喎。雖然細女只得兩歲人仔，佢已經話，「一定唔會畀阿女求其用番皂洗臉就算，點都要有基本護膚程序！」
Anina嘅大仔5歲，一對龍鳳胎就兩歲。佢指，3個仔女天生有濕疹問題，佢覺得，係香港空氣令到小朋友好易起濕疹，搞到塊面紅咗一撻撻，做家長真係覺得煩。
佢話，希望趁小朋友仲細，要快手幫佢哋醫好斷尾，最好嘅方法就係少用刺激性、含化學成份嘅皂液同佢哋沖涼，亦要保持佢哋皮膚唔好太乾，除咗避免用過熱嘅水沖涼，每日都要塗少少保濕霜。
咪以為小朋友唔使塗防曬，佢話，去沙灘或戶外活動點都要塗防曬產品保護皮膚，平時出街就塗較低度數SPF15嘅防曬產品咁話。