電盈（008）忠實小股東陳仲翔早排話打算自訂一個叫做「N0WTV」嘅車牌，準備好5,000蚊，希望以底價買到，然後就畀電盈旗下now TV作為宣傳推廣之用，佢仲喺股東會直接問主席李澤楷會唔會畀番錢佢。
運輸署正正會喺嚟緊嘅星期日拍賣259個自訂車牌，華華唔見有「N0WTV」可以拍賣，但就發現幾個財經相關嘅有趣車牌。
呢幾個車牌包括正路嘅「F1NANCE」（金融）、「TRADER」（交易員），有股票概念嘅就有「L0NG 138」、「0NE CENT」，前者可以解做買入138呢隻股票，咁啱中建富通嘅股票編號就係138，後者就係1仙，不過應該冇乜人想持有得1仙嘅股票啩。仲有一個就係「G00GLE」，唔知邊位咁鍾意佢嘞。