噚日係佛誕，又名浴佛節，香港都有大型嘅浴佛大典，立法會主席曾鈺成、基本法委員會副主任梁愛詩都有參與。一日連走幾場嘅民建聯主席李慧琼就相當認真，佢話事前專登上維基惡補典故，仲分享咗對因果嘅睇法。Starry以邱吉爾同發明盤尼西林嘅生物學家弗萊明嘅故事證明種善因、得善果。話說弗萊明爸爸救過邱吉爾，為咗報恩，邱吉爾爸爸就出錢供弗萊明讀書，後來邱吉爾有病，又俾弗萊明發明嘅盤尼西林救番。Starry講嘅故事非常有寓意，但八方都查過維基，原來弗萊明後來否認係盤尼西林救番邱吉爾。點都好啦，有因有果，希望民記撐政改時，都不忘如是因如是果嘅道理。