禮拜三舉行季內最後一次全泥夜賽，天文台預測天氣回復正常，場地未必太濕。今次共編三項路程，1200及1650米各三場，另有兩場1800米。
其中1200及1800米預期利放頭馬，睇番近三次沙田夜賽共12場泥地1200米，原來好易估，估中邊隻放出就掂，沿途放頭之馬拎到五冠五位，最近3月25日就有「怡昌之星」快放贏馬。至於季內四場夜賽泥地1800米，分別有「大把世界」及「長勝勇將」一放到底，另外「的確好靚」放入Q，所以今戰出爭以上兩項路程之放頭馬，例如頭場「帶利來」、第三場「愛頑皮」、第四場「海紅寶」及第六場「信眼光」都可以優先留意。
至於泥地一哩就有得追，最近3月25日兩場同程夜賽頭馬「博愛福星」及「準備就緒」，都係從中後位置衝上贏馬，所以第二場「自動導航」及第七場「兵工闖」等擅跑泥地夜賽之後追馬，絕對可秤先。