市場成日話，而家北水打救港股，但實情係，南水對北水作用，可能大過好多人想像。近日內地券商喺香港狂抽水，繼廣發證券（1776）、華泰證券（6886）後，嚟緊應該仲有唔少同業排隊上市，金融時報估計，呢幾隻券商總集資規模可能達到140億美元。
呢筆錢對而家A股來講，非常緊要，稱為救命錢亦不為過。點解？A股呢輪牛市全靠孖展等槓桿資金頂住，但內地券商可借孖展額要受制資本規模，最高理論上限約兩萬億元人民幣，其實上周已經爆咗額。如果一旦冇新孖展金入市，市況就會回落。
券商又籌到140億美金，等於又可以借多幾千億人民幣孖展，簡直係A股及時雨。難怪上禮拜中證監話要查場外孖展，以往類似消息都會嚇到內地股民騰騰震，但今次不跌反升！
黃尹華