韓國男星近年俘虜咗好多香港女仔嘅心，就連股評人胡孟青（青姐）都唔例外。佢最近睇電影《赤道》首映成功捕獲兩位韓星Super Junior崔始源同埋池珍熙之外，上星期喺港交所（388）舉辦嘅LME亞洲年會晚宴，竟然都俾佢捕獲到港交所一位韓國型男同事，佩服！
港交所呢位韓國型男叫做俞泰碩，大約4年前加入港交所，之前喺芝加哥商品交易所（CME）工作，佢喺港交所主要負責定息與貨幣產品業務發展。
青姐聲稱，當晚係跟對方換卡片時，見對方姓名甚似韓國人，傾多幾句先知對方係美籍韓國人。
不過佢話，俞泰碩頂多都係港交所型男3號，型男1、2號係邊位？咪就係港交所主席周松崗與行政總裁李小加囉，青姐係咁講㗎！