飲啖水，就搞到成隊波唔見咗60萬人民幣（約75萬港元）獎金，真係因小失大！喺周日重慶力帆作客遼寧宏遠場中超，重慶門將隋維杰就係行開飲啖水，被對手快開罰球射入，追成1:1完場。重慶三分變一分，原本100萬人民幣嘅獎金，變做得番40萬，仲引嚟假波疑雲。
據澳彩提供嘅賠率，重慶最初賽前受讓平/半，被睇低一線。之後遼寧狂落飛，喺賽前嘅晏晝仲轉埋盤，重慶受讓到半球，終盤嗰陣下盤有成兩倍。喺主客和方面，和波嘅賠率都降溫，由開盤嘅3.1倍到終盤3.3倍。
踢流浪時曾返廉署助查
雖然被外界睇低，但重慶靠劉宇喺36分鐘嘅入波領先。去到84分鐘，宏遠博到個罰球，門將隋維杰見成班人加埋球證圍住個波，諗住冇咁快開到出嚟，就去門柱邊攞支水飲，飲飲吓個波突然踢咗出嚟，對方嘅丁海峰仲射入空門。重慶球員當然投訴啦，但球證判入波有效，最終兩隊踢成1:1。據內地傳媒報道，重慶一場中超嘅贏波獎金有100萬人仔，打和就得40萬，所以隋維杰飲一飲水，就搞到成班兄弟唔見咗60萬！
呢件事賽後引起好多網民討論，有人覺得重慶抵輸，一來話隋維杰唔夠集中，二來話班後衞唔醒目，冇阻止對手快開罰球；亦有細心嘅香港網民發現，隋維杰原來喺香港踢過波，仲涉及過一單假波案，引起更多猜測。隋維杰以前踢過四海流浪，喺2010年俾ICAC拉咗返去飲咖啡，但後尾只係得愉園國援于洋被控行賄；佢嗰陣話清者自清，唔滿意廉署拉佢落水，仲叫香港人唔好歧視國援喎。
前隊友梁興傑：衰唔夠集中
我求大俠搵到喺流浪同隋維杰做過隊友嘅梁興傑，呢位現效南華嘅門將話唔信隋維杰會打假波，「佢幾好人，肯教我，我有唔好嘅地方都會改正我。我覺得球證可能冇講到話要吹雞先准開波，但隋維杰都有啲問題，唔應該喺禁區度飲水，仲要背住龍門，有啲唔啱。」
