著名經理人陳淑芬近年偏愛投資工廈，繼3年前掃入觀塘天星中心兩層工廈，新近加碼用過千萬元買入附近嘅鴻貿中心工廈單位。
陳淑芬啱啱用大約1,048萬元，買入鴻圖道31號鴻貿中心26樓2及3室，共1,718方呎，呎價約6,100元。以市值呎租約17元計，回報大約3.3厘。
今次陳淑芬並唔係突然入市，其實佢早喺2012年已經用470萬元買入同層1室，783方呎，呎價6,003元。今次增持樓面，已有近半層單位揸手。不過其餘半層由發展商新地（016）收租，相信陳淑芬暫時幾難統一全層業權。
同鴻貿中心相隔一幢大廈就係以陳淑芬娛樂公司「天星」命名嘅天星中心，3年前以近7,000萬元買入兩層，今年初以23.4萬元，將呢兩層租畀黃柏高（Paco）旗下太陽娛樂文化。