早幾日有間公司喺勞工處登廣告請人兼職派報紙，時薪有35蚊，學歷就冇要求，總之識讀、寫中文，勤力、主動兼守時就ok㗎喇，主要工作就係喺地鐵站派報紙，每星期返3至5日，每日朝8晚6，實質只係返3至6個鐘，仲有要交通津貼，聽落好似唔錯吖。咁啱差唔多時間，有公司就請編輯兼記者，一星期返4至5日工，學歷方面話明要有專上程度，仲要良好粵語、一般普通話及英文，同埋要識用文書處理軟件兼具備良好寫作技巧，人工就同派報紙時薪幾乎一樣，係35至40蚊，只係唔知點解會有佣金囉。真係搵食艱難，雖然大家都叫做為新聞賣力，但真係估唔到派報紙同記者人工居然會一樣。