政圈呢幾年有唔少後生仔女冒起，仲要個個好快就獨當一面出晒位，好似學民思潮新任發言人黃子悅，就喺佔領期間絕食一炮而紅，佢噚日喺民間團體同泛民搞嘅全民拒絕假普選運動記招，同民主黨主席劉慧卿同枱，已經同卿姐過招，火藥味甚濃。
話說各發起團體代表循例講幾句嘢，講解今次行動理念，「拾念」代表葉錦龍發言時力倡泛民大團結，話要目標對準政權而唔係打擊同路人。
「有人網上攻擊民主黨」
不過到黃子悅講嘢時，就認真唔客氣地公開挑機。黃子悅話近日有啲傳言泛民議員同中央進行會面，學民樂見今日有泛民議員在場表明佢哋否決政改嘅決心，之後講咗句：「希望各位議員唔好重複之前2010年所犯下嘅錯。」
八方現場所見，在場得兩個立法會議員，一個係工黨主席李卓人，另一個係卿姐，呢番說話針對邊個講顯而易見。
卿姐一向講嘢都唔會轉彎抹角，所以佢等大家發完言後，就立即向黃子悅還拖，話啱啱有代表話唔好互相攻擊，「今日已有人喺網上攻擊民主黨，亦都話2010年係犯錯」。
卿姐話2010年民主黨支持一人兩票政改方案畀政改向前行一步，「我唔會接受呢個係錯」，仲越講越㷫：「如果大家坐埋呢張枱，係咁搞，亦放晒上網指摘民主黨，我話畀大家聽，我哋係唔會接受！」當時仲在座嘅黃子悅見卿姐還拖，即時面色一沉，但就冇再還擊。
究竟卿姐口中嘅「放晒上網指摘民主黨 」係乜？原來學民噚日出咗個題為〈堅拒密室談判——不要重演2010年的轉軚歷史〉嘅聲明，係facebook上載民主黨當年同中聯辦官員嘅合照，點名批評民主黨同民協等8名議員，當年政改「閉目塞聽地轉軚」，呼籲唔好重蹈覆轍，唔怪得卿姐咁㷫啦！
李八方
mailto:[email protected]