唔少香港人無咖啡不歡，去年有兩個年輕人喺群眾集資平台Kickstarter籌款，話要整部可以透過智能手機遙控嘅咖啡機，根據唔同咖啡豆同用家喜好沖咖啡，就引起唔少人注意。
部咖啡機叫Arist，由趙公允同趙公亮兩兄弟提出，好快就集資到超過84萬美金，成績唔錯，費清同事都有訪問過佢哋。不過上個月開始，網上唔少人話兩兄弟係騙子，批評佢哋今時今日都未拎到部咖啡機出嚟畀大家睇，要求退款。
#30人要求退款
費清前排去過佢哋喺科技園嘅辦公室，趙公允即場用部機沖咗杯咖啡招呼費清，仲即場拆開部機畀費清睇吓，證明唔係空殼一個。佢話Arist第二代已完成約7成，預計10月就可以順利出貨。
佢話最近的確大概有30人要求退款，但因為即刻退款好大機會影響到現金流，所以現階段唔會退，今日佢哋會公佈進度、收支同退款安排。佢解釋一直冇再公開部機，係因為申請緊多項專利，萬一曝光就可能會有影響。
至於好多質疑話佢哋呃資助、呃獎項，費清都問過頒獎機構互聯網協會同科技園，佢哋都話查過後證明絕無其事。其實年輕人有新發明創業都係好事，費清都好希望佢哋部機順利面世，等大家唔使落手落腳就可以嘆番杯咖啡。
費清
＃要生計，也要生活 ＃毋忘初衷