擁有Gucci、YSL等多個牌子的法國奢侈品集團Kering（開雲），早前在紐約法院入稟控告阿里巴巴賣「A貨」。開雲形容阿里是賣假「同謀」，不單為商家提供平台，仲賣埋關鍵字，如果上淘寶打「cucci」或「guchi」，就會引導用戶找到一堆Gucci假貨。
對於Kering的指控，馬雲早前出席公開場合時作出回應，但他重點並唔係澄清阿里有無做錯，而是多次建議Kering要和阿里「合作」打假，形容這才是解決問題之道。睇到呢到，海迪不禁想起《大時代》中丁蟹的一句「至理名言」：「呢單案嘅重點，唔係我有冇殺人，而係我浪子回頭金不換！」
面對A貨橫行，很多品牌都無Kering直斥其非的勇氣。它們多數做法，是選擇在天貓開舖，成為阿里合作夥伴，然後再自己成立打假部門，每日上淘寶搵可疑商戶，向阿里舉報。不過，由於舉報過程需要品牌明確講出可疑產品「假喺邊」，有甚麼具體特徵，唔能夠隨便「封舖」。所以訊息來來回回，有時都幾費時失事。有品牌直言，阿里近年在檢舉假貨工作上，的確有進步，不過與他們認為滿意的水平，仍是有一段距離。
海迪