每年到六四悼念活動前夕，支聯會網站必遭不明來歷黑客攻擊，今年當然唔例外，不過以往都可以安然度過，但八方近日上支記網站，發現乜都冇晒，成個網站淨得支記同六四紀念館地址、同埋佢哋facebook、twitter賬戶連結，唔通支記網站終於頂唔順黑客攻擊，已經壯烈犧牲？
八方第一時間問支聯會秘書李卓人，究竟支記網站搞乜鬼？阿人承認大約一、兩個星期前關閉咗個網站，當然就係因為臨近六四悼念活動前，不明來歷黑客攻擊越來越多，但呢個唔係主因，主要考慮係支記網站其實同教協網站存放喺同一伺服器，黑客攻擊支記網站，變相搞埋教協個網站，當支記網站受攻擊至運作唔到，教協網站亦受牽連，支記覺得咁落去唔係辦法，最後決定暫時關閉網站。
李卓人話市民可以繼續去支記同六四紀念館嘅facebook、twitter專頁，睇到支聯會六四26周年悼念活動消息。
至於支聯會網站就要等過咗各項六四悼念活動後，再搵其他伺服器供應商搞掂佢。