你們看過《毛記電視》嗎？或許應該問，你們知道《毛記電視》嗎？
打正食花生旗號，貫徹「毛聊」態度，《100毛》旗下網絡電視「毛記電視」前日終於在一地花生殼中正式開台。開台前，毛記夥拍前主播方健儀的宣傳片已錄得逾百萬次點擊，五萬餘個like，由旗下「偽人」所拍短片亦獲熱烈討論。
「利君牙好似朱千雪呀！」
「東方昇似黃賢誌」
「東方昇粉（心心）」
要一夜成名踏上銀色舞台，加入毛記電視或者比選大台小姐更快。
加入毛記有甚麼條件？成為毛孩有甚麼福利？除了上fb抽水及被抽水，毛孩工作還包括甚麼？100毛老細是否常常黑面？最尾一題，小記可以很肯定答你，「好似係」。其餘則由100毛創辦人，林日曦本人回答吧。（記：記者林：林日曦）
記：有無收過特別CV？
林：有人寄自己本書同自己隻碟嚟，我覺得幾好，因為可以直接話我知佢哋係乜嘢人。另外我哋次次出post請人，都會收到幾百份CV，有人見冇回音，會直接上嚟office話要見工，佢哋起碼贏咗幾百人先。
記：有冇請到佢哋？
林：……冇。
記：聽講你啲員工可以黑你面，真係架？
林：對我嚟講，我自己黑面多啲，佢哋好nice，笑容滿面。其實我唔係想惡，我慣咗Poker Face，我內心知道唔係黑面，但係表面上係黑面，佢哋都唔係太鍾意。
記：100毛係咪請緊人？
林：隨時都請緊人，黑紙由蚊型公司擴張中，所以隨時都請人，設計、銷售、市場都請。
記：有咩要求？
林：要求佢有網癮，如果唔上網、冇常識，唔知世界發生乜嘢事嘅話，個人都唔會好笑，好似明光社提倡褪網嗰啲一定做唔到。對「偽人」要求係要夠放，唔好太拘謹。
記：一定唔請咩人？
林：一定唔請咩人……政見唔同會唔會唔請，其實都唔一定，反而係唔同政見嘅人唔會嚟見工，李偲嫣唔會想嚟做公關。如果佢（不同政見人士）竟然嚟見工，而佢竟然係好叻嘅話，太家咪夾吓囉……李偲嫣難啲，唔關事，但係我唔想講落去，因為可能涉及樣貌歧視。
記：自問係咪一個好老細？
林：應該有眼都見到，我係一個好差嘅老細，你幻想100毛係一間地獄，我係最討厭，全城最衰嘅老細就差不多。
記：有乜嘢同想加入你公司嘅人講？
林：想入嚟做嘅人，我勸佢唔好。