莊思敏、鮑起靜、邵音音、陸駿光等前晚喺觀塘一座工業大廈為鬼片《碟仙碟仙》開鏡，其間喺拜神儀式時即遇上大光燈突然熄晒嘅怪異事件，認真嚇親人。莊思敏喺接受訪問時透露屋企曾有鬼出沒：「阿妹（莊思華）成日去蒲，帶咗啲污糟嘢返嚟，當時我喺房，聽到出面有啲『咿咿吟吟』嘅聲，但係又唔知乜嘢嚟，後來工人又話見到白影唔做，後尾請咗法師返去搞掂咗。今次拍鬼片，都怕帶啲污糟嘢返去，所以事前搵咗啲開過光嘅佛珠戴。」
鮑姐遮眼睇首映
莊思敏仲話今次拍戲去唔少陰森地方取景：「喺山頭嗰啲地方去廁所，一定要講『唔該借借』，打底衫一定唔可以係紅色，不過我好多紅色打底衫。」
鮑姐喺戲中會同兩大鬼后羅蘭及邵音音合作，佢飾演懲罰壞人嘅鬼，要化「行」妝拍攝，鮑姐仲笑言個妝嚇親老公㖭。問到鮑姐呢套戲首映時，會唔會唔敢睇？佢話：「都係用我最拿手嘅方法，就係遮住對眼。之前睇《殭屍》首映嗰時我都係咁。」
此外，陸駿光拍戲其間懷疑自己撞鬼，突然狂嘔5次：「嗰幕戲講緊碟仙嘅嘢，我要食煙，仲好似有幻覺咁，好似見到其他演員要奸笑咁。我自己都信呢啲嘢。」
撰文：馮仁昭