一個人旺起上嚟，咩事都可以發生！好似練馬師沈集成咁，近排瘋狂贏馬，今日連用最霉洋將連達文跑盲門草地之「金巴裡好」都竟然贏到，唔寫個服字畀佢都唔得。
第五場「金巴裡好」一向只識贏泥地短途1200米，之前草地最叻跑過第四，近仗名次亦越來越後，今場四班賽換上未騎過之連達文，初跑田草1600米排14檔，完全冇長力根據，居然一放而回冇馬追到佢，就咁爆出季內暫時最冷之245倍win，派彩2,454.5元；不過仍不及歷季最冷頭馬01年10月「百勝福星」所創之315倍win；沈集成近九戰八次有馬贏，旺氣冠絕全體練馬師。
連達文來港一段日子，連同「金巴裡好」暫時只贏過三場，頭馬一次冷過一次，由20倍「平民百勝」到29倍「常開心」再到245倍「金巴裡好」，清一色只贏田草，雖然贏馬少，但長買每隻座騎10蚊win有賺。
呢場跑第二「馬來之珍」都係24倍冷門，連贏派一萬一千幾；第三、四名分別是5.2倍「金龍華」同42倍「勝利攻略」，四重彩派到接近103萬。第一口孖T更加冷到派121萬幾。