【政壹花生友】
袋住先定唔袋住先？唔少政界中人都話呢段時間，已經俾政改呢個議題搞到好悶，唔只泛民主派話想速戰速決，查實連建制派中人私下都話，快啲搞掂等佢哋集中精力搞選舉好過。而喺鋪天蓋地政改新聞之間，有單新聞其實都喺政界內成為茶餘飯後佳話，就係港大學生唔肯去內地交流，唔少政界內港大校友對此莫不搖搖頭。
有日花生友同某政界中人食飯吹水，佢話近期有件事令佢呢位港大舊生唔太開心，原來係講緊港大副校長（教學）何立仁提起，希望強制學生到內地交流嘅問題。呢位政界中人話，無論認唔認同中國嘅做法都好，始終中國都係一個大國，「作為大學生，去呢啲國家見識吓，有乜問題？唔通想做井底之蛙？」
花生友隨即問，等學生自由選擇唔係更好咩？咁何立仁又講得衰，仲乜話唔交流就唔好入港大咁呢？呢位政界中人搶答：「喂，呢位副校長係外國人，通常講嘢會有啲幽默；而且佢講嘢場合係高桌晚宴，大家都係放鬆啲㗎啦，點估到同學咁大反應？」
據佢所講，佢同校友講起呢件事，無不嘆息點解師弟師妹咁驚去內地、覺得佢哋咁大個唔應該驚被洗腦，覺得何立仁唔使道歉，校方講番清楚只係未落實咪算囉。花生友插嘴，學生有咁嘅情緒都好難怪，凡事勉強無幸福，被迫去咗，盞嘥時間。
花生友