紐卡素經過連續10場不勝後，在煞科日絕地反彈，靠穆沙施素高和約拿斯古迪利斯建功，主場以2:0擊敗韋斯咸，護級成功。相反，侯城就算主場踢和曼聯0:0，搶得一分，亦要陪同般尼及昆士柏流浪降班。
在煞科日前，英超形勢已大定，車路士穩奪冠軍，曼城、阿仙奴及曼聯亦取得其餘三個歐聯席位。昆士柏流浪及般尼提早降班，周日的唯一懸念是第三支降班球隊究竟是侯城還是紐卡素。
賽前領先侯城兩分、掌握護級主導權的紐卡素微調陣容，收起了技術型的雷米卡比拿，改用活力十足的安尼達，前鋒就由柏比斯施斯夥拍利維亞尼。在中游無欲無求的韋斯咸未有留力，幾乎派出最強陣容，包括倒戈的中場路蘭。紐卡素初段搶攻，多次攻入韋斯咸禁區；其中前鋒利維亞尼在六分鐘攻門斜出，12分鐘就由真馬特遠射被救出。
「抗癌戰士」奠定勝局
及後，韋斯咸站穩陣腳，紐卡素的攻勢就變得隔靴搔癢。24分鐘，到韋斯咸策動反擊，艾朗加斯威爾長傳，達寧突破越位，窄位射門，僅被門將告魯爾救出。54分鐘，克服了睪丸癌的「抗癌戰士」約拿斯古迪利斯左路傳中，穆沙施素高在雲斯頓列特及艾朗加斯威爾夾擊下頂入，助紐卡素開紀錄；他立即開心到除衫慶祝。完場前，約拿斯古迪利斯入多球，為球隊鎖定贏2:0。
賽前非勝不可的「老虎」侯城繼續排出3-5-2陣式，謝拉域夥拍近期深受重用的達美尼度耶攻堅；至於已經鎖定前四名的曼聯就派遣強陣作客，朗尼傷癒復出擔任正前鋒，迪馬利亞就取代費蘭尼踢正選。侯城求勝心較強，上半場的威脅埋門較多，達美尼度耶兩分鐘近門頭槌，但曼聯門將域陀華迪斯（VV）接實。一分鐘後，朗尼遠射高出，之後曼聯的進攻變得老鼠拉龜。
侯城兩「詐糊」英冠再見
17分鐘起的三分鐘，曼聯門前風聲鶴唳，侯城罰球斬入禁區，VV甩手，麥沙尼門前加多腳射門，但他越位在先；19分鐘，艾穆罕默迪接應羅比巴迪的左路傳中，頭槌一頂，角度及力度俱佳，但VV神勇撲出底線。在之後的角球攻勢，侯城再一次將皮球射入網窩，但門前的達美尼度耶越位，侯城在三分鐘內連食兩次「詐糊」。換邊後雙方互有攻守，就算曼聯後備兵費蘭尼及後被逐，最後兩隊仍踢成0:0，侯城下季降落英冠。
另外，韋斯咸發表聲明，不會跟領隊艾拿迪斯續約。
文：咖喱
識睇，一定係睇足英台【英波Live】：
http://soccer.appledaily.com
http://bit.ly/engballlive