一位浸會書院時代畢業嘅老板對浸會大學好關心，在中環街頭碰到，居然問左丁山：「錢大康啱唔啱做浸大校長？」老實講，錢大康教授唔係話要做中大校長，左丁山冇咁留意，但亦唔係當作不知，畢竟左丁山在港一家22人坐埋食飯，除咗一位第一代，兩位第四代唔計，有五位係浸會書院畢業生，五個中大新亞校友，一個中大新亞學生，一個港大博士，為時事辯論起嚟，中大與浸大勢力，在左家相當平等，難分勝負，故此對浸大情況平時都會講到嘅。由讀書時代至到今日中環財經界，認識嘅浸大朋友亦多，譬如樓神趙國雄，新鴻基金融總裁梁永祥，星展銀行高層莊希（Janet Chong），和黃港口集團執行董事錢乃駿，名震話劇界嘅毛俊輝，傳媒界嘅TVB袁志偉，商台陳淑薇，有線趙應春，前南華早報老總劉志權，大記者楊健興及廣告界大佬袁文俊等等，多到恕難盡錄，至於建築工程界，浸會書院年代嘅土木工程系畢業生今日位居高位者亦多，不讓港大專美，只可惜此系俾謝志偉執咗啫。
講到錢大康做浸大校長，梗係有資格啦，左丁山識咗錢教授起碼十五年，知道佢在電腦學術界有成就，管理大學亦有經驗，朱經武做科大校長之時，成日返美國主持研究工作，實際上科大日常校務由其他人管理，錢大康係副校長，出力甚多，後來又轉去港大做副校長，襄助徐立之，其中又做過RGC（研究資助局主席），既有此經驗，去管理浸會大學，點解唔得？誰曰不宜？錢教授並非固執之人，好易同佢溝通，無論從邊方面睇，錢大康都唔會輸蝕俾吳清輝與陳新滋兩位校長，學生話錢大康不熟浸會情況喎，根本唔係問題，一上任進入情況就得啦，馬斐森未來港之前，又點會熟悉港大情況？大學挑選校長，講程序間間大同小異，都係有校董會Search Commitee，有獵頭公司搵人，入選名單由校董組成之聘任委員會面試，最後提名一個候選人，循例做吓諮詢。如果有兩三個候選人見學生、教師，就係選美模式，以前張信剛校長退休後，城大請校長，就搵咗陳家強、陳新滋「競選」，事情曝光後就失控，卒之兩個人都退出唔制，城大之後先至搵咗郭位做校長。有此前科，每間大學選新校長，都係只揀一位見師生，以免夜長夢多，而又未必選到最適合人選。