老友向八方報料，月底有個古董Leica相機拍賣預展，54件展品總值約2,000萬元，估價最高嘅係一部槍形相機（Gun Rifle），大約300萬元，呢部係原型版（prototype），老友話仲矜貴過正式生產版，早前有部同款機拍賣，據講成交價逾400萬。
小朋友機身畫畫
另一部比較特別嘅，係電子版M6，呢部都係原型機，編號係1234567，而跟機嘅摩打編號則係00008，都算絕配，估價約170萬元。八方同老友講呢兩部機好離地喎，佢話未算，話有部哈蘇先係堅離地，事關部機係為美國太空總署而造，上過太空，返回地球，之後由哈蘇高層收藏，估價約40萬元。展覽仲有兩部做慈善拍賣嘅Leica M同Leica ME，機身圖案係按小朋友畫嘅畫而塗上，色彩繽紛，同Leica一貫黑色機身完全唔同，幾得意，兩部機一併拍賣，估價約36萬元。拍賣會6月中舉行，有興趣可睇呢個網址： http://www.westlicht-auction.com/index.php?id=3。
