【中環→灣仔】
關之琳舊年8月為鍾鎮濤(阿B)同范姜喺峇里嘅婚禮擔任證婚人,但大前日佢因為要去歐洲出席雙年展,所以冇出席二人喺香港補擺嘅婚宴。不過,原來之之日前已經返抵香港,前晚更相約老友劉嘉玲喺中環荷李活中心食晚飯,同行仲有近十位男、女朋友,相當熱鬧。
嘉玲拉隊去灣仔
嘉玲大前晚孖老公梁朝偉出席阿B同范姜嘅婚宴,前晚就選擇撇甩偉仔,同之之一齊出席飯局。當晚約10點半左右,分別以牛仔look打扮嘅之之同嘉玲,與大班朋友由中環荷李活中心行出嚟嗰時,見到二人臉上均泛紅,明顯係飲咗酒,而大班人行出大廈之後,似乎喺飯局入面仲未傾夠,佢哋分成兩堆企喺大廈門外繼續傾偈。
由於入夜後街上比較寧靜,各人暢談期間傳出嘅笑聲亦頗引人注目,傾咗十多分鐘之後,眼利嘅嘉玲終於發現有記者拍照,佢就即時提醒朋友:「小心啊!有記者!轉頭見啦!」
經嘉玲提醒後,各人隨即四散上車,而嘉玲及之之則分別坐上兩架七人車離開,原來佢哋食完飯轉場,與友人相約喺灣仔香港萬麗海景酒店會合,繼續狂歡。而嘉玲同之之當晚心情亦相當好,落車時見到記者亦全程笑笑口。
採訪、攝影:畢紹基、潘冠恩、徐錦池