立法會主席曾鈺成一直被視為特首黑馬，不過曾主席噚日接受有線電視訪問時就話有自知之明，唔會考慮喇，仲話明連造王者都唔做。
曾主席話退休之後打算搞個倡導型智庫，呢點都好多人聽過，不過原來個智庫唔只做研究、交個報告咁簡單，而係會周圍宣傳，如果有特首候選人睇中佢哋智庫理念，仲可以幫佢整埋政綱，一旦選到就係治港藍圖。嘩，咁即係做造王者？曾主席即時否認，話係人揀佢，唔係拒揀人，智庫只係輔助角色。
講到尾，曾鈺成認為要做特首要有三點質素：鮮明政治理念；有政治才能團結唔同背景及意見者，吸納到叻人幫你；高標準道德操守。梁振英做唔做到？佢答：「我唔會跌入你嘅陷阱，我唔會評論。」