這天第九場三班1000米直路賽開跑前，沙田馬場上空風雲變色，雨電風雷咩都齊，天都黑晒。結果賽事喺滂沱大雨及雷聲中進行，閘前電算機一樣風起雲湧，已經憑「一片光明」、「吉祥」起孖之柏寶，畀落飛黨睇中，今場佢隻賀廐座騎「寶成福星」由30多倍，被重插至9.9倍着啡燈開跑，涉及注碼約170萬。
今場跑落22倍冷門「要風得鋒」在巫斯義胯下放到離行離列，好在柏寶唔錫身冇放棄，力鞭「寶成福星」從後殺上，及時追過「要風得鋒」率先衝線，人馬首度合作即勝，呢匹四歲愛爾蘭自購馬，取得在港第二捷，造就柏寶2015年首次中三元，但大贏家卻是落飛黨，中「寶成福星」啡燈win，扣本後獲利約1,500萬。
至於「要風得鋒」力拼保Q，搭「寶成福星」連贏派近一千元，三、四名分別係初出之半冷門「香江穩勝」同久休復出之大冷門「金獅福將」，四重彩派34萬幾，中到當然和味！