呢排幾多嘢關教育局局長吳克儉事，佢噚日仲抽時間同政治助理施俊輝同埋四個教育局代表，出席第八屆教師體育節。
吳克儉話噚日特登同老婆請咗假先嚟，又俾老婆問佢到底係咪支持體育運動㗎？事關佢近排成日支持足球比賽，要跑得又踢得，又要保持平衡，所以去咗踩單車，經昂船洲大橋全程13公里，上斜落斜唔准自己落車。
吳克儉仲話大中小學、幼稚園同職訓局夾埋全港有成10萬名教師，「強老師、強教育」喎。開幕禮後吳克儉一時技癢，攞住足球踢兩腳表演，仲笑住話要幫手執波。教育局仲派咗施俊輝打乒乓波，原來佢中學同大學都好鍾意打乒乓波，不過𠵱家工作繁忙少練波，但最少都兩個月打一次喎。