今晚英超落幕，不過坊間唔捨得嘅唔多，因為今年啲波其實幾悶，冠軍車仔一早定奪，摩連奴話攞唔到冠軍先叫做悶！冇錯唔關佢事，係其他疑似爭標分子唔爭氣啫！曼城錢多但冇厘鬥心，耶耶托尼淨係得個軀殼，淨係靠質高攝個阿二位置，睇頭同話題仲少過車仔，悶。
阿仙奴表現時高時低，但終極排名十年如一，前四衝線又達歐聯標，仲有機會冧莊爭足總盃，多得有山齊士呢位最佳收購一個救全家。至於曼聯以季初雷聲大人腳計其實唔合格，但起標位低，起碼比上年進步咗，加上都叫力壓宿敵利物浦入番前四，粉絲有笑位。今年利記堪稱最多話題球隊，冇咗蘇七都keep住有新聞人物見報，本來最被睇好嘅巴神，場內場外都令人興奮而來、失望而回，悲喜交集嘅有神奇隊長告別揮手區，幫到利記人氣鼎盛，但走嘅終需走，下年隊紅軍可能可以當新球隊咁睇。
五、六位攞歐霸盃資格，不過冇一支強隊會流露恨踢表情，免得俾人話冇大志，肯定第五嘅利記如是、第六嘅熱刺如是，係第七嘅修咸頓可能會着緊啲，但如果最後過唔到熱刺頭，就要望足總盃阿記贏維拉先有歐霸位。
降班區亦係近年最奄悶一次，兩隊班已降，係多得紐記近10場輸足9場陪你癲，搞到Sky TV都要焗揀兩場護級大戰同步直播。牌面當然都係多侯城兩分嘅紐記高啲，但球隊家陣成盆散沙，球迷們趕走咗柏度先發現老闆艾殊利都唔係好人，話佢又孤寒又冷漠，買隊波純粹為咗轉手賺錢。
咁話說紐卡素有位啱啱100歲嘅老球迷占士，13歲就開始入場睇比賽睇足80幾年，可以話有乜風浪未見過吖，但前兩日伯伯都忍唔住話今年係咁多年最差一屆，真係情何以堪。咁其實阿老占原本可以唔使咁擔心，因為對手韋斯咸𠵱家爭緊公平競技獎，照計就做唔成攔路馬，不過肥Sam之前都食過艾殊利無情雞，咁唔知佢呢鋪會唔會扮晒方展博，有仇報仇呢？
KEYMAN
節目主持
電郵：mailto:[email protected]