【採訪手記】
中港股市大熱，連小記都耐不住誘惑，開始學人炒股。採訪民間股神，一個重要的問題是「冧把，唔該」，答案卻令人沮喪。華哥說：「莊家只會獎勵極少數散戶，個個聽消息都有賺，莊家食咩？」亞通叔更說：「後生女，我勸你唔好炒股啦，我都唔畀啲仔女炒！」
「股市同賭場一樣恰窮人」
但明明亞通叔也炒得忘形！他自嘲：「吸毒者，就係呢啲。」一隻股票轉個手賺了四毫子，亞通叔就開心到像細路一樣：「賺一百幾十都好啊！頭先餐粉麵返嚟啦。想以股搵錢不可取，有閒錢玩吓，腦袋唔好太快退化。」
華哥愛請股友飲茶，還派錢給跟他建議買股的人，每次100元，股友覺得「雙重豐收」，華哥稱之為「分享勝利」，這日他們碰頭的茶樓叫「分甘同味」很貼題。甚麼都不懂買大細般買股、盲目聽消息……席間大家批判的炮灰級別股民，不正是我嘛？
華哥一句「股票贏錢一定要買啲嘢」，可惜在香港，賺幾多倍都不夠買層樓，大概贏得「雞碎」也會「畀番」股市。不過除了錢，炒股也為心跳加速的快感？認同感？與未來的一場對賭……而最終K.O.我的，是蔣小姐一句：「股市同賭場一樣係恰窮人。」