今季賽事其中一個特色，就係不時有tvb藝員入馬場，為馬主朋友愛駒打氣，好似謝東閔、張振朗例牌行孖咇，力撐「心花怒放」馬主蘇智恒；有翻版舒淇之稱的陳芷尤，就曾入場支持「現代財星」；而阿雪孫慧雪近日喺「君悅灣」贏馬後，更拖仔拉頭馬。
至於35歲無綫當家花旦徐子珊，就係灰馬「金筷子」嘅忠實擁躉，事關佢同馬主金礦團體成員梁浩然夫婦相熟，「金筷子」4月兩次出賽子珊都有入場，不過唔知係咪同隻馬八字唔夾，嗰兩次「金筷子」均後上不及僅敗屈居亞軍，始終未見子珊拉頭馬。
講番梁浩然夫婦，這天(23日)早上佢哋到快活谷馬場觀看另一愛駒「金飯碗」試閘，結果隻馬跑第四，試閘後梁浩然透露同徐子珊好friend，每次有馬出賽都會call佢入場一齊玩，佢笑笑話自己都唔明點解3月一役子珊冇到場「金筷子」即勝，但之後有出現「金筷子」就跑第二。隻馬將於周日(24日)再戰，梁浩然直言機會唔錯，亦已再邀請子珊喺場內食飯兼睇馬，好希望一齊揚威凱旋門影頭馬相。
睇番「金筷子」本月初谷草1200米負133頂磅及排最衰12檔，都力追只輸半身位，可見隻馬的確好fit兼有分喺手，今次跑沙田長直路利追，4檔好得多，負磅亦下調，難怪梁浩然充滿信心。