【拆局】
北京在六四前安排京官與全體立法會議員見面，不少泛民議員對此感意外，部份人認為今次安排，反映會面也是行禮如儀，「只係做足工夫好向上頭同埋港人交代」，去與不去也無甚重要；但也有泛民認為不能放過溝通機會，「起碼當面向王光亞講清楚，香港有好多人反對人大8.31決定，絕對唔係少數，北京企硬係會付出代價」。
揀六四遊行日會面
有看淡的泛民中人分析，北京選擇在六四遊行當日見全體立會議員，「淨係揀日子已知冇乜誠意見泛民」，再加上人大法工委副主任張榮順早前在深圳見建制派，擺出極強硬姿態，令他們相信今次會面也是行禮如儀，不會有成果，無非是要「做戲做全套」，「既然好多人叫中央見吓泛民，咁咪即管見見，咁見完咪好交差，等泛民、市民死心，一係唔願意都支持（政府方案），一係否決就算」。
但也有泛民認為，不能放過今次與京官見面機會，就算中央仍企硬，也要當面向王光亞說清楚，香港除泛民議員，有四成民意是反對人大8.31決定，「同支持幾乎一樣多，絕對唔係支持8.31決定佔大多數」，要令北京知道政改企硬是逆民意而行，「最終北京、特區政府係會付出政治代價」。
■記者莫劍弦