用假證搵食要坐監、掟雞蛋挑戰高官要坐監，早前有電影宣傳更有人為錢自願坐監。當年曾縱橫黑道多年的吳志雄，傷人入獄已成往事，淡出江湖轉行入電影圈，角色多數離不開黑道身份，從第一套《監獄風雲》的盲蛇，到《古惑仔》最經典的大佬B，十多部電影都與黑有緣。志雄哥日前於旺角街頭宣傳時仍自得其樂，毫不介意重提往事，前塵就似他的紋身，都成歷史印記。
撰文：藍文浩
外表凶神惡煞，訪問期間愛女探班卻流露出溫柔眼神，由江湖大哥到銀幕大哥，志雄哥依舊霸氣。為新片《壹獄壹世界：高登闊少踎監日記》宣傳，志雄哥毫不介意將「入冊」經歷用來自嘲，他過往曾在專訪提及過，90年代他已有過千門生，經歷過高高低低，《古惑仔》漫畫與電影是一大成就。面對記者問及如何與古惑仔周旋的話題，志雄哥從說話語氣到擋格攻擊慢慢細數。
撩事鬥非似細路
古惑仔至愛撩事鬥非、好勇鬥狠，兩幫人於街上爭執被打的新聞睇到悶。志雄哥被問到，若突然遇上「俾人兇」該如何應對時說：「可能我哋人多啲，就叫你過嚟，問你邊瓣，唔啱聽就打。其實都係細路仔行為，我哋當時70年代已經係咁，呢個行為最唔好就係撩事鬥非。好多時係後生嘅性格，一定係攞威嘅。」
他續說：「其實後生嘅大佬都係攞威，佢哋要表現比啲𡃁仔睇『喂，我幾威呀！我就係大佬』，如果對方係社團嘅，咁咪打過囉。如果對方話冇嘅，『冇？咁跟埋我啦！』就收埋對方做𡃁，踢人入黑社會咁樣。」
絕招1，低聲下氣求放生
衝突常因一個眼神而起，「睥乜呀睥！」之後，可能就已杯碟橫飛。正所謂拳腳冇眼，志雄哥就說：「其實好簡單，弱肉強食。講聲對唔住，哥哥我冇心得罪你，我冇邊瓣嘅，你放過我啦。或者覺得會有衝突嘅，咪跑囉，一路跑一路叫救命，走入人群堆囉。」
絕招2，彎腰護頭叫救命
倘若真的「開波」了，被圍時應如何保護自己？志雄哥彎腰護頭說：「最緊要就係頭同面部，心口同背脊就唔太怕，彎腰護頭起碼唔會打到腦震盪先，身體任佢打啦。好多細路仔打架都會起腳或者點，到時就要自己搵生路喇。」
他續道：「如果俾人打跌落地都起唔到身㗎喇，最緊要就係呼叫求救，有幾大聲嗌幾大聲，因為呢個世界就算更惡嘅人都好，香港係自由社會，我哋有警察、有法律嘅。你嗌救命古惑仔都會驚嘅，差人嚟拉㗎嘛！所以係咁意打完你佢就走㗎喇，攞個彩咁啫。」
絕招3，勢色唔對兜路走
志雄哥又奉勸說：「乖乖仔讀書嘅其實好少去夜街，有時可能有聚會，不過有啲平時好乖，一飲兩杯有醉意就搞事。𠵱家好多新聞話便利店門口打架，就係飲完啤酒借意撩事鬥非，乖仔三更半夜去便利店買完嘢就走啦。盲精啞毒跛招積，四眼就鹹濕，入去買個condom先啦！就算去酒吧都要揀，有啲龍蛇混雜，我都唔敢去啦，飲又唔飲得、打又唔打得，人哋見到你特登玩你，叫你死老鬼，咁你點答佢吖？我哋呢啲退咗役咁耐，俾人撩咁點搞？咁咪唔去囉。」
