耶倫終於唔再做羅家英飾演的唐三藏，斬釘截鐵講出今年加息合適，雖然仍留有少許轉圜餘地。過去數十年美元升值萬劍歸宗都會引發海外市場大幅波動，但同樣招數要人中兩次伏好難，各國已紮行馬應對，中國當然唔例外。
豐臣秀吉當年之所以打朝鮮，其中一個原因係功臣太多，土地太少。古時封邑食祿，分封需要土地；現代封企食祿，已唔一定需要土地。以色列前總統佩雷斯曾經講過，過去嘅爭鬥主要為咗爭奪領土，今時今日好多事已經可以用科技取代。土地唔再係爭鬥重點，但企業係重點。
無論係諸侯王劃地自重定CEO擁企自重，根柢盤纏交錯，久之則政令不行，要改變呢種弊象嘅其中一種方法，就係炒合併。企業總裁掌握公司重要資料同人脈，要請其讓賢唔係容易。但炒合併意味架構會重組，而關鍵在於一個「炒」字。因為如果真合併，一步完成，反作用力可能大。但炒合併，來來往往反反覆覆，亦真亦假半虛半實，每炒一次等同削權一次，等羽翼漸去時先嚟真，一下搞掂。
事實上金融海嘯後嘅經濟環境，M&A亦係一種企業生存之必然。卡夫食品同亨氏合併，輝瑞收購惠氏，09年後隨便數都一堆。在公司高層角度，要跑數，但成個市場環境都冇肉食，M&A係最立竿見影嘅跑數法。但要做M&A，公司唔夠大就冇着數，無論係用股份代付定融資，都需要公司市值夠大。未來最少三年美元強勢大背景下，中國破局嘅其一方法，將會係資本輸出，而資本輸出對撼就需要企業夠大。合併相信同一帶一路有關外，其次則係對比外企唔對稱嘅企業，即外企太大隻，但國企太細隻。大國博弈，若唔能夠安內憑乜嘢同人講條件。所以今浪炒合併，係值得令人期待的。
Mr. Tregunter