最美港姐李嘉欣喺賽日入馬場大家見得多，出嚟睇晨操，呢日(23日)可能係第一次，不過就唔係去沙田，而係去快活谷，事關今朝快活谷有試閘，雖然嘉欣三匹愛駒「一寶」、「貳寶」同「駟寶」都冇份試，但老爺許世勳的「控惑」就參加第五組1200米大閘。
嘉欣與丈夫許晉亨拍拖現身，雖未見嘉欣的兒子，但佢哋帶咗家族好幾位小朋友和少年亮相，嘉欣更母性大發，與亨亨各自抱住小朋友睇馬，不過與其話嚟睇晨操，其實更似周末家庭樂馬場半天遊，當然嘉欣與丈夫仍好緊張「控惑」嘅表現，隻馬在蔡明紹胯下沿途緊隨「得全勝」，始終未能超越後駒，跑得一席第二，走勢算唔錯，季軍則是「欖球大使」。
講番告東尼馬房之「控惑」，今季10戰全不入前四名，已跌到五班31分，老實講令人非常失望，不過本月忽然兩度試大閘力谷狀態，再加上嘉欣忽然入場睇晨操，都有啲唔尋常，「控惑」稍後報名出賽，話唔定有進步演出！