怎樣靠月儲三千蚊成功上車，是一個問題。如何能夠月儲三千蚊，對剛畢業的大學生來說，卻是另一個問題。今年香港通脹為4.5% ，同期樓價升幅(尚未計三四月份變動)逾一成五。有人事顧問明言畢業生起薪點不與通脹掛鈎。
安俊人力資源顧問董事總經理周綺萍表示，今年大學生起薪點低見9000元，「缺人嘅行業相對高啲，好似建築、資訊科技、工程或者醫療藥業會有1.3萬至1.7萬，行情差嘅好似出口製造業同物流業特別低，有9000元至1萬。」她表示，僱主聘請畢業生時，其薪金水平難與通脹掛鈎，「如果間公司每年都吸納人才，當舊年請嗰個人工1萬，今年加人工5%，即係有10500蚊，如果我新請嘅又用10500蚊請，咁會做成一個漣漪效應，全部員工都要加，就好似最低工資咁」。
本港整體失業率長期低企，二月到四月為3.2%，但15至24歲組別失業率高達8.5%，而失業的多為學歷較低人士，大學生仍然有價有市。
於港大修讀風險管理科目的George表示，期望起薪點有1.3萬至1.5萬，若低過1.2萬則難以接受。另外，就讀新聞系的韓國交流生Rebacca，希望畢業後能於駐本地的國際新聞機構工作，「我知本地新聞工作者人工好低，自己希望有1.5萬，如果冇嘅話，1.2萬到1.3萬都可以接受，不過香港租金貴，我唔知萬二蚊夠唔夠生活」。
此外，有加拿大交流生擔心就業問題，「出年會喺加拿大讀最後一年，我讀國際關係，希望可以喺外交部門工作，不過我其實都唔知自己會唔會搵到工，如果真係搵唔到，會試吓同本科無關嘅工作。人工？高過最低工資就得啦」。
記者：林幗欣
攝影：李潤芳