都說香港人唔識笑，但午飯時間，在油街對出的小空地，八、九個貌似OL的上班族，一時似人型蜈蚓扮雞仔跳舞、一時扮挾餸飲茶，笑聲不絕，「跟住我做，秘訣係要唔怕肉酸！」說這話的，是呂慧姸(Natalie)。她是社企「玩樂瑜伽」的創辦人，也是首批在港引進這種新興運動的地道香港人，「冇好嘢發生、有人唔俾你笑，你更加要笑」。笑，可以無需理由，信不信由你。
記者：呂麗嬋 攝影：馮就康
這個透過網上召集的快閃式活動，名為「午間大笑」。這天，就來了九個人，大家互不相識，有犧牲午飯時間到來大笑的憂鬱OL，也有送完仔女返工，到來見識的全職師奶。「試過笑足6個鐘，笑到胃抽筋」。這是Natalie的第二堂課，應藝術團體「油街實現」邀請，免費教網友飯前鬆一鬆。「做大笑瑜伽，一樣要做熱身，不過唔係拉筋，係要先HoHo HaHaHa，開吓聲先」。
03年中大經濟系畢業的小妮子，就算閒談，都掛著笑容，她笑說全因自己「笑點低」，「咩都笑一餐」，但原來，曾幾何時，她與大部分香港人一樣，壓力大到唔識笑。「嗰時喺中學教書，教嘅都係考試班，朝七晚七，返到屋企仲要做嘢，成日失眠同胃痛，有次失聲，去睇中醫，嗰醫師話，你把聲要充份休息先會好，唔係睇幾多醫生都無用」。失聲但不敢告假，只因每個老師都有個「無形負債表」跟身。
「一病就要其他老師幫你頂、做代課。愈告得假多，欠債愈多，欠落一身債，點會有人鍾意你？」壓力大，身體出警號，但病了又不敢告假，陷入惡性循環。三年多前，她下定決心改變，放自己一個悠長假期，「嗰時睇雜誌見到介紹大笑瑜伽，覺得幾得意，又未去過印度，索性飛過去學，仲考埋導師牌先走」。那時，大笑瑜伽在港沒多少人認識，朋友都好奇叫她教，相約在將軍澳公園試玩。
「呢種瑜伽最得意係，愈多人一齊笑就愈好玩，笑會互相感染，見其他人笑，會笑埋一份」。膽粗粗攞著紙牌，即席招募學員，「都幾淆底，好多人眼望望，但無人郁，見到涼亭有人喺度坐，就厚住面皮，過去拉人入嚟玩」。死心不息，利用網上平台介紹，又上網「吹雞」免費教，竟吸引了大班好奇網友，一試效用。
「可能同嗰平台有關，最初嚟嘅，都係外國生活咗好多年嘅ABC，佢哋最初都會覺得奇怪，一班人圍埋一齊笑，真係可以減到壓？」與其坐在鍵盤前質疑，不如現真身，試試箇中感受，這是她向質疑者下的「戰書」。開了一個頭，口耳相傳，慕名參加的人愈來愈多。只是，不愛笑的城市，一堆人無端聚在一起大笑，難免惹來不安！
「有人投訴，話有班人喺度又跳又笑，太嘈，保安接到投訴，梗係要做嘢」。搵食艱難，保安哥哥一樣有難處，一行人唯有打游擊，九龍公園、中山公園、天馬公園，只要有草地，就有他們的笑聲。反應好，三年前成立了社企，甚至將這種新興玩意，帶進醫院。「就算無病無痛，好多人都會話，無嘢值得笑，但大笑瑜伽嘅邏輯係：冇好嘢發生、有人唔俾你笑，你更加要笑」。
「我試過去東區醫院教班，有個病人話自己6個月未笑過。對於好多人嚟講，要笑好難，尤其係係重症病人，好番會擔心復發、有藥醫又擔心負擔唔到醫藥費」。要符合值得大笑的條件，過關斬將，期間仲會不斷搬龍門，只因解決了A煩惱，又會有B煩惱出現。「既然笑係咁難，不如試吓話俾自己知：笑，其實可以唔需要理由，試吓張大口，笑咗先算」。
笑完，失戀的人依舊失戀；患病的人，依舊活在復發的陰霾下，「大笑瑜伽唔係魔術，好多問題，其實無解決到，但至少，一班人陪你一齊笑，心情好咗，再去面對同一件事，你可能會發現，根本無你之前諗得咁差，原來係有解決嘅方法」。不需假裝世界一瞬間變得很美好，只為笑出個好心情而行出第一步。今日，你又笑咗未？
大笑瑜伽，是新興減壓運動，於95 年由印度孟買一名醫生Dr. Madan Kataria引入，他認為人不論真笑或扮笑，中樞神經都都會受刺激，釋放出令人心情愉快的安多酚，結合瑜伽式呼吸和伸展動作，配合想像力及小組活動，就算不用依靠笑話，都可以由假笑變為真笑，舒緩壓力，令身心愉快。這種另類瑜伽，不單在印度受歡迎，其後並傳到全球70 個國家或地區，在歐美尤其盛行。
呂慧姸說，玩大笑瑜伽形式自由不同地方可以加入地道元素，如在香港，想像大笑的活動，由去飲茶食一盅兩件，到幻想自己沖港式絲襪奶茶，完全即興，「希望個社企可以自負盈虧方式運作，為商業機構搞班，收入用以支持病人組織嘅活動」。收入或大不如前，但走出框框，卻是新天新地，有甚麼開心得過人生下半場，以教人開懷大笑為業？