肥佬黎叫食飯，到灣仔名店食燕窩、炒翅，同座者有老前輩紫微楊、董社長、主筆李等，未輪到左丁山發言，只係問咗肥佬黎一句：「印刷傳媒如報紙、雜誌嘅前景如何？」肥佬說得幾悲觀，指全世界紙媒嘅銷路都下跌，經營困難，雜誌會遲早消失，報紙可以撐耐啲，但都係走向夕陽嘅啫，如果受到政治打壓抽廣告，形勢更險。
抽廣告呢回事，全世界媒體若得罪廣告商銀主，隨時會發生，非獨香港為然；而且抽廣告逐漸變成系統性，此則與大牌子經營模式改變有關，譬如世界最大廣告客──寶潔（Procter & Gamble）去年已宣佈在全球削減廣告預算，會出售公司旗下百幾隻產品牌子，只留下銷量最好嗰幾十隻牌子（例如Tide），呢個宣佈令到麥迪遜大道大聲叫慘，因為P&G領導潮流，其他公司如Unilever跟風，成個行業嘅廣告預算大量縮減，影響到的不止廣告集團，各式各樣媒體同樣失去不少收益。
但係抽壹傳媒集團廣告還涉及政治性，咁就係世間少有（泰國軍人當政之後，就有此作風）。左丁山前星期在灣仔撞到一位有錢人，佢問左丁山關於寫稿一事，拋下一句評語：「我以前係蘋果廣告客戶，效果都唔錯，但後來俾有力人士召見，勸我目光遠大啲，要睇住中國市場，叫我識做，我返屋企諗咗一晚先至明白點樣識做！你懂的！」哦，係噃，呢位先生間公司嘅廣告久已不在蘋果出現，懂了，懂了。
報紙難做，非獨香港為然。1919年創刊之New York Daily News，電影「超人」Superman主角Clark Kent係記者，服務於一張報紙叫做The Daily Planet，就係以Daily News為原形，呢張報紙曾是紐約市最暢銷報紙，25年前日銷一百萬份以上，依家只剩番312,734份！1991年，呢份報紙員工大罷工21個星期，幾乎破產，後來由英國報業大亨Robert Maxwell收購，點知幾個月之後，呢位麥士維先生在大西洋坐遊艇墮海溺斃，死後被揭發佢曾在集團公司長俸基金偷走咗十億美元，成為大醜聞，於是到咗1993年股權轉到另一位美國富豪Zuckerman手中，代價係三千六百萬美元。Z先生聲言會將份報紙翻生，不過難敵虧蝕連年，近月卒之宣告投降，尋找新買家。唔怕死之中國富豪，不妨即刻買下，到紐約威番吓，市長州長都會怕咗你㗎！