中大高級講師蔡子強早前撰文質疑特區政府上周突然提出，將今年9月3日定為一次過嘅特別公眾假期，以紀念抗日戰爭勝利70周年嘅做法，覺得如果政府要咁做，點解又唔將前幾年辛亥革命100周年，定為特別公眾假期作紀念？護主心切嘅「白宮發言人」、新聞統籌專員（IC）馮煒光見到後，即時向蔡子強開火，批評佢傷害咗「經歷三年零八個月的市民的感情」。
蔡子強噚日再撰文反駁，批評馮煒光上綱上線，做法同文革時極左派無乜分別，認為同馮煒光進行呢種低水平討論糾纏，只會沒完沒了。蔡子強果然料事如神，因為喺佢文章發表後，馮煒光即刻喺自己facebook再插佢「罔顧父執輩在日本鐵蹄蹂躪的感受」，但唔少網民發現，佢個status顯示咗，馮煒光發表文章時候，正身處日本小樽市，即刻佢去咗振興緊曾鐵蹄蹂躪佢父執輩嘅日本旅遊業啦，係咪好鬼諷刺呢！
