無綫新聞部資深小花走得就走，好似周嘉儀、蔡雪瑩、高芳婷等索主播個個走人，少咗好多「甜美嘅笑容」，近日原來上位小花李穎琳（Vicky）亦都離開主播組，昨日喺微博留言：「各位，我暫時會離開主播組，會轉去做番老本行『財經新聞』，短期內或者會少左（咗）在電視機面前同大家見面，但我相信一定會『再會』既！你們會繼續支持我嗎？」
李穎琳原本喺大台《創富坊》過檔去亞視做財經主播，上年12月才返大台入新聞部，有啲「baby fat」嘅佢都幾受網民歡迎，不時有主播討論區貼出佢報新聞嘅電視截圖，可見有唔少fans。
據知，佢一向份人都幾nice，喺大台新聞部都算多朋友，好似同陳嘉倩、張文采及梁凱寧等份屬好友，有傳今次李穎琳做番老本行，係因為新聞部總監花哥袁志偉唔太鍾意佢，先冇得留喺主播組？