順順利利，曼聯喺今季由新帥雲高爾帶領加上使大錢買人下，成功重返英超前四，返番去搵大錢嘅歐聯戰場。除此之外，佢哋仲有大把收入來源，啱啱就喺今夏美國之旅加推多場熱身賽，實行搵更多美金。賺得嚟之餘紅魔亦唔會慳，轉會市場重開之後將再次大事擴軍，最新目標係德國國家隊中場舒韋恩史迪加。
鬥聖荷西地震有睇頭
曼聯喺上年夏天都有去美國出戰國際冠軍球會盃，仲一路打到入決賽，贏埋宿敵利物浦捧盃，對雲高爾嚟講，可謂充滿美好回憶。
球隊今年繼續參賽，原本已經安排咗三場賽事，同CF阿美利加、巴塞隆拿、巴黎聖日耳門交手。紅魔日前確定將會加多一場，7月21日喺柏克萊同美職聯球隊聖荷西地震較量吓。
曼聯管理總監阿諾話：「自從60年代開始，曼聯周不時都會去三藩市，好開心今夏會第四次嚟到。對巴塞場波嘅波飛已經賣晒，曼聯係灣區嘅受歡迎程度真係唔講得笑。我哋同聖荷西地震都有淵源，名宿佐治貝斯曾經踢過呢隊波，大家都好期待兩隊歷來首次交手。」
睇嚟雖然今季冇份踢歐聯，但紅魔商業價值似乎不減，搵錢能力依然咁勁。事實上，歐洲豪門都會趁休季去其他國家踢熱身賽，雖然實際意義係搵錢遠大於練兵，但都係無可厚非。
吼實「兩老」小豬丹尼爾
另一邊廂，紅魔下季重返歐洲賽，人腳陣容一定要加強，領隊雲高爾已經不斷吼住入乜貨。日前傳出佢嘅最新目標，係拜仁慕尼黑嘅舒韋恩史迪加；雲帥喺2009至11年執教拜仁嘅時候，已經同呢位喺上年幫德國贏世盃嘅中場合作過。曼聯嘅收購球員方針，一向好少買啲年紀大過27歲嘅球員，小豬到下季英超開鑼嗰陣已經31歲，不過雲帥就依然睇好佢。小豬同拜仁剩返一年約，所以轉會費方面可能幾相宜，1,000萬鎊就有交易。
紅魔另一目標係巴塞嘅巴西右閘丹尼爾，有傳佢會喺下周二開記招宣佈離隊，而曼聯打算開出一份15萬鎊周薪嘅合約。嘩！丹尼爾都成32歲，雲高爾唔通想喺下季組老人兵團？不過曼聯上季買人用咗成億半鎊，相信今年都唔會手軟；大手交易陸續有嚟。
有來就有去，曼聯增兵之餘，最有可能離隊嘅梗係門將迪基亞。呢係西班牙門將係咪去皇家馬德里就仲未有聲氣；不過今日係佢歌手女友艾杜妮嘅重要日子，出戰歐洲國際歌唱比賽《Eurovision Song Contest》決賽。
識睇，一定係睇足英台【英波Live】：
http://soccer.appledaily.com
http://bit.ly/engballlive