歐洲波到尾聲，聯賽名次已定晒，競爭性大減，所以今周又轉攻日聯，精選浦和紅鑽（圖）對鹿島鹿角的「讓球」開上盤。浦和紅鑽近期氣勢如虹，六場比賽五勝一和，上場仲大炒FC東京四個一皮，球隊攻守平衡做得十分好，左右兩閘宇賀神友彌同森脇良太不停助攻，甚至有入波，鹿島鹿角近五場讓波盤輸咗三次，呢隊前冠軍唔易搶分。
星期日英超收爐戰侯城對曼聯，「讓球」紅魔平/半就要上盤。聯賽榜尾三尾四差兩分，唔係侯城死就係紐卡素亡，不過，侯城危都冇用啦！有睇阿曼大戰朋友都知，曼聯又有番正常表現，更重要係冇左朗尼啲波反而順好多嘛，中場有桑馬達都夠做，相反侯城三連敗，曼聯同佢哋又無親無故，做乜放水畀你先？希望我無諗錯喇！季尾收爐呢條二串一希望可以幫到啲旅費！
提起旅行，早兩日喺旺角撞到加拿大返嚟既四眼仔，見佢隻腳石膏都未拆就走入球場睇波，我話佢真係同足球分唔開。四眼仔一邊望住兩支班霸打緊決賽，但一方面又搖搖頭，我問佢咩料，四眼仔話：「我去咗加拿大幾年箒，香港足球就搞到咁，真係咁少年輕人踢波呀？」
我望住佢問咩事？四眼仔唉咗一聲：「領隊，你睇吓球場22個正選球員，加埋得嗰兩個25歲，其餘全部廿幾三十幾，好似睇元老比賽咁，港超聯就係咁啦？」我細心數吓數吓，又係，望向四眼仔無言以對。
本地職業領隊
耳聽八方 專收好料