最近德國一位學者推出名為《Charming Bowels》新書，大讚踎厠比坐厠更容易排便，可減少便秘同痔瘡。但踎得耐會腳痺，或者膝關節退化人士跟本踎唔到，本港醫生及營養師教路，只要在馬桶前放張凳仔，坐馬桶時腳踏凳上身體向前傾45度，就容易便便；平日飲食要生果、水和油三者缺一不可，因油份可為腸道提供潤滑作用。
記者：陳凱迎
坐在馬桶上久久未能排便，困惱不少人。德國年輕微生物學家Giulia Enders的《Charming Bowels》作品近期大熱，成當地輰銷書，可見要解決「便便」一事何等重要。她在書中指蹲下來大便比坐馬桶更加暢通，原因是人的腸道本身彎彎曲曲，坐在馬桶上，腸道末端就會擠疊，要花更多時間或更大氣力，才能把大便排出，亦因而增加罹患痔瘡的風險。相反，蹲下時腸道末端沒有擠疊，通道變得暢順，大便更易排出體外。
但踎得耐難免腳痺，本港的腸胃肝臟科專科醫生陳安安教路，其實在馬桶前擺放矮凳仔，坐下時腳踏在凳上，身體向前傾45度，同樣可以令腸道末端暢通無阻，「咁坐就可以拉直個angle（角度），易啲痾出大便」。但她提醒便秘與否不只關乎排便姿勢，醫生們一般會要求便秘病人，多做運動、改善飲食，並要學習大便時如何運氣，才能令這件「大事」辦得更順利。
陳安安指出，飲食不均衡是港人便秘的常見原因，多吃蔬菜和水果可減少便秘，但有部分素食人士滴油不沾，結果反而導致排便困難，「唔可以話完全唔攝取油份，只係唔好咁多」。
尚營坊高級營養師黃凱詩指出，要預防便秘，生果、水和油三者缺一不可，其中油份可為腸道提供潤滑作用，正餐可以落1至2茶匙煮食油，「如果真係好唔想用油，可以用果仁代替，因為果仁都含有高質素嘅脂肪，每餐可以食大概20粒」。有關均衡飲食的資訊，可瀏覽衞生署網頁：
http://bit.ly/1IRdEw8