香港青年人真係唔知做咗乜嘢錯事，特區政府一連委任兩個極品做「青年事務委員會主席」。
上一任主席陳振彬，芳齡57歲，而政府覺得，佢可以代表青年人，囉。
我知，年紀大一樣可以hit到年青人，如果你係喬幫主，佢走嘅時候56歲，但佢設計嘅iPhone，可以令到年青人賣腎都要支持。原因，佢有年青人嘅心，「Stay hungry.Stay foolish」。
相反，我哋嘅年青人代表，不懂謙虛，也不懂和年青人打交道。
陳振彬成名作便是主持年青人論壇時，居然叫年青人「收聲」。
佢係咪當咗年青人係佢公司條𡃁？一個心態上完全歧視、對年青人有偏見嘅大叔做青年代表，我都想叫佢「收聲」。
好啦，終於捱過咗57歲嘅年青人，換嚟一個35歲嘅劉鳴煒做主席。結果，佢係一個富二代。
富二代唔係罪，但同大部份年青人有距離，因為叫「富二代」就唔只係「年青」，而係「年青才俊」囉。
富二代仲要住喺「堅離地」，居然教年青人如何在月入萬五的情況下節衣縮食慳娛樂「睇少場戲去少次日本」儲首期。
佢忘記咗幾樣嘢，第一，佢未試過月入「只有」萬五，佢叫人儲錢捱苦，無說服力。
第二，佢老豆正正有份起一啲令年青人成世都上唔到車嘅樓，然後佢個仔教人點樣儲錢買樓……主席你係咪潤我哋呢？
第三，佢根本唔明白年青人心態。年青人明知不吃不喝都俾唔起首期，手上嘅錢與其放喺銀行「賺息」，不如拎出嚟消費讓自己高興一下，睇戲和去日本血拼，是這一代年青人可以負擔得起的最大奢侈。連唯一娛樂都要剝奪而做樓奴，你忍心香港年青人變成行屍走肉嗎？
找這些極品做青年人工作，難怪這個政府會失去整整一代的年青人！