由周融搞嘅「保普選反暴力」大聯盟早前聲稱喺一連9日、遍佈全港18區嘅簽名運動中，收集到121萬個市民簽名支持「袋住先」，其實唔少問責高官都各自以「官員」或「個人」身份簽名撐政改，但當中到底有冇人唔跟大隊呢？八方真係好想知道囉，早前仲逐一問過官員，睇吓有冇人係冇響應。
結果，答案不出八方所料，一啲驚喜都冇。特首梁振英、政改三人組、同埋大部份局長當然聽聽話話簽晒名，向中央顯示忠誠，但截至噚日為止，財政司司長曾俊華（圖）、運輸及房屋局局長張炳良以及公務員事務局局長鄧國威，都唔肯回覆到底有冇去街站簽名喎。
官場中人話，鄧國威掌管公務員事務，唔簽名係合理兼正常，阿爺都會體諒；之但係財爺同張炳良呢……咦，佢哋上次都好似冇簽名反佔中喎，到底係覺得簽名呢個行為唔夠型，抑或有啲嘢始終過唔到自己嗰一關呢？無論點，八方希望佢哋唔會因為冇簽名而有手尾跟。