日本暢銷漫畫改編嘅電影《死亡筆記》，喺亞洲賣個滿堂紅，早排日本NTV台宣佈將會開拍劇集版，隨即引起《死亡》迷對新版嘅主角人選萬分期待。話晒松山研一演嘅L，同藤原龍也演嘅夜神月太過經典，昨日劇集版《死亡筆記》公開咗卡士，結果由26歲嘅窪田正孝扮演夜神月，20歲嘅山崎賢人就演L，部份網民都話點都唔會及得電影版嘅卡士，亦有意見話，佢兩個調換角色會比較適合，因為家陣喺《給阿爾吉儂的花束》中做山下智久同事嘅窪田正孝，一向都較cool，啱做L多啲，窪田究竟係咪演繹到夜神月後來嘅瘋狂就要拭目以待。至於山崎賢人家陣演緊早晨劇《希》，外表比較正氣，今次演L都隨時有助佢人氣再下一城。
不過最離奇嘅係，L接班人N一角，原本係男角，但劇集版變咗由喺《海女》中演GMT成員嘅優希美青扮演，網民話接受唔到角色由男變女喎，估唔到優希健康好啲，一復工就被柴台。
撰文：艾未未