灣仔修頓室內場噚晚上戰Big 4大戰,永倫(紫衫)喺甲一對住飛鷹,全程驚險到球迷嘩聲四起。首節永倫一度領先11:4,但之後飛鷹新兵Vytas同莫家俊內線大爆發,助球隊半場追平34:34。第三節永倫大前鋒方誠義四犯纏身被換走,飛鷹把握機會反超前59:50,但關鍵時刻永倫有星將泰那射入三分,更獨取全場最高嘅24分,助球隊以81:72驚險取勝,力保金身,但泰那都話「好醜怪」。至於尾場南華鬥安青,雖然有余理洋返加拿大出席家姐畢業禮缺陣,但喺羅意庭帶領下,半場仍然拋開51:34,新星梁兆華獨取全場最高嘅23分,終幫南華以118:62大炒對手,取得聯賽五連勝。