珠海學院新聞及傳播學系一批學生，近日喺校內貼大字報同校方「開拖」，關注組召集人梁樂祈更稱校方若唔改善，會發動罷交學費行動，呢場大戰觸發點竟然同王祖藍同前商台節目《茶煲裏的查篤撐》主持梁德民有關。
新傳政策關注組指，一批平面組三年級學生不滿負責學生刊物《珠海新聞》嘅副教授柯達群，要求最新一期以藝人王祖藍受訪話「婚後更想偷懶」做頭條，學生覺得有其他新聞比呢單娛聞更有新聞價值，所以唔贊同，更擔心下個月出嚟實習，俾人質疑冇新聞sense。
而去咗珠海做高級講師嘅DJ梁德民負責嘅一科「電台節目及製作」，要求三班共90人以家暴為題做小組訪問及個人習作，仲話明搵相同人士訪問可能扣分，結果有社工組織一日收到十幾個同學電話，打去學系投訴，難怪學生咁嬲。