【鳩嗚乜乜乜】
蘋果iPhone 6c提前曝光？費清冇呃大家，英國《衞報》噚日真係咁報道。《衞報》記者發現，蘋果官網喺賣充電lightning底座嘅網頁，疑似流出一幅iPhone 6c嘅圖片。
網民只要click入網頁，就會見到一張大大張嘅相，嗰張相嘅iPhone都係有彩色外殼，同之前嘅iPhone 5c好鬼似，但不同之處就係Home button（主鍵）嘅正方形圖案唔見咗，《衞報》記者就懷疑，呢個就係新增咗指紋識別功能（Touch ID）嘅iPhone 6c真身喇。
早前有外國傳媒就報道，蘋果公司今年9月除咗會推4.7吋嘅6s及6吋嘅6s Plus外，仲計劃推出一款4吋屏幕嘅6c，但就用返膠殼同次一級規格嘅配置，希望搶佔中、低價手機市場。3款新機預計今年5月就會投產，最快9月開售，售價遲下先公佈。至於今次呢個係咪iPhone 6c真身？玩慣宣傳伎倆嘅蘋果公司梗係唔會證實消息啦。
＃要生計，也要生活 ＃毋忘初衷
費清