【本報訊】房委會首日共售出45個居屋單位，荃灣尚翠苑成準買家首選，逾半買家都選購該屋苑A座中高層，可遠眺荃灣市中心的06室單位；相反屋苑地下有溶洞的元朗宏富苑，樓價雖最便宜，但全日「冇人吼」，錄零成交。新居屋樓王尚翠苑的A座28樓06室一個約511平方呎單位，售價326萬元，開售不足半小時售出。
今期5個居屋屋苑中，以荃灣尚翠苑規模最大，3座共962個單位。房委會最新成交記錄冊顯示，昨成交的45個居屋單位，尚翠苑佔26個，22個買家都選購A座06室單位，實用面積約511呎，中、高層單位幾乎被搶購一空，其餘4個分別購入該屋苑的其他座向單位。有買家指尚翠苑樓價雖較其他屋苑貴，但位處市區、交通方便，而A座06室單位座向較好，可遠眺荃灣市中心。
元朗宏富苑「冇人吼」
其次受歡迎是擁山景的沙田美柏苑，有14名買家選購，大部份購買可眺望城門河的07室單位，但有零散山墳景的03至06室單位則沒人揀。5個屋苑中最便宜的元朗宏富苑，地下有溶洞又鄰近明渠，雖步行至西鐵朗屏站只需約5分鐘，但都「冇人吼」。
■記者譚靜雯